Десетици илјади жители на Москва денеска организираа еден од најголемите политички протести во Русија последниве години, барајќи слободни избори во градот.
Како што пренесуваат светските медиуми, Русија не доживеала опозициски демонстрации од вакви размери уште од периодот 2011 – 2013 година, кога демонстранти излегоа на улиците поради наводни изборни измами.
Неколку часа пред почетокот на протестите, полицијата ја уапси главната опозициска активистка и организаторка на демонстрациите, Љубов Собол, која штрајкува со глад.
Маскирани полицајци упаднале во нејзината канцеларија, а полицијата соопшти дека имала информации оти Собол и други активисти планирале да направат провокација за време на протестот.
Демонстрантите минуваа низ детектори за метал, носејќи транспаренти и знамиња на четвртиот протест во период од еден месец, барајќи кандидатите од опозицијата да се вратат во изборната трка на локалните избори закажани во септември.
Градските власти го одобрија денешниот протест, за разлика од минатиот викенд, кога полицијата уапси повеќе од 1.000 луѓе, некои насилно, на протестот кој беше нелегален.
Групата „Вајт каунтер“ тврди дека на денешниот протест се собрале околу 40.000 луѓе, а полицијата пребројала 20.000 учесници.
