Њујоршкиот аеродром „Ла Гвардија“ од денеска е затворен за сообраќај, поради делумната блокада на федералната влада во САД што резултираше со „недостиг на персонал“ за негово нормално функционирање, соопшти американската Сојузна воздухопловна администрација (ФАА).
Во соопштението на ФАА се посочува дека од денеска се стопираат сите летови кон и од „Ла Гвардија“, кој е најголем аеродром во САД за домашни авиолинии.
Поради спорот меѓу американскиот претседател Доналд Трамп и демократите во Конгресот околу Буџетот, федералната администрација во САД делумно е блокирана веќе 35 дена.
Главна причина за спорот е одбивањето на демократите, во Буџетот да се предвидат 5,7 милијарди долари за изградба на ѕид на границата на САД кон Мексико, на што инсистира Трамп.
