Во вчерашниот силен земјотрес со интензитет од 6,3 степени според Рихтерова скала, кој го погоди западниот дел на Иран, се повредени 634 лица.

Засега нема податоци за загинати, а причинета е материјална штета на повеќе згради. Потресот бил почувствуван и во Ирак.

Вознемирени граѓани ги напуштиле своите домови, соопштија локалните власти. Гувернерот на провинцијата Керманшах, Хоушанг Базванд изјави дека настраданите се главно полесно повредени, а само околу 20 луѓе се хоспитализирани. Дошло и до прекин на електричната енергија.

Тој додаде дека ситуацијата е под контрола. Спасувачки екипи биле веднаш испратени на терен, а ангажирани се војската и Револуционерната гарда.

Епицентарот на земјотресот се наоѓал во близина на градот Сарпол е Захаб.

Минатата година на истото место во земјотрес со интензитет од 7,3 степени загинаа над 600 луѓе, а 9.000 беа повредени.