Поранешниот француски министер и сопственик на „Адидас“, магнатот за кој се врзани многу скандали, Бернар Тапи, и неговата сопруга биле нападнати од крадци при грабеж на нивниот дом во близина на Париз, соопшти полицијата во неделата.
Тапи и неговата сопруга спиеле кога четворица мажи влегле во куќата во Комбс-ла-Вил во близина на Париз околу 30 минути по полноќ, по што ги претепале и ги врзале со кабли.
Доминик Тапи успеала да се ослободи и повикала полиција од куќата на соседот. Таа има полесни повреди од неколку удари во лицето и е пренесена во болница на преглед.
Се очекува наскоро да биде пуштена. „Таа е добро“, соопшти внукот Родолф Тапи.
Седумдесет и осумгодишниот Бернар крадците го удриле со палка по главата, но тој одбил медицинска помош, изјави обвинителката Беатрис Ангелели.
Крадците украле два часовника, од кои едниот „ролекс“, обетки, нараквици и прстен, изјави за „Франс Прес“ извор близок на истрагата.
Пред три недели во истиот регион во Париз, две фудбалски ѕвезди од Пари Сен Жермен, Аргентинецот Анхел Ди Марија и Бразилецот Маркињос беа цел на провали, од кои едната беше и насилна.
Тапи, кој во 1992 кратко време беше и министер во социјалистичката влада на Франсоа Митеран, изгради спортска и медиумска бизнис империја, а имаше и повеќе проблеми со правосудниот систем.
Со богатство се стекнал преземајќи пропаднати компании, а наводно, притоа користел сомнителни методи.
Често во јавноста се истакнуваше со своето богатство, па познато е дека купил јахта од 72 метри, како и фудбалскиот клуб Олимпик Марсеј, кој ја освои титулата шампион на Франција, додека тој беше негов сопственик.
Тој беше министер за урбанизација во владата на Франсоа Митеран во 1992 година, а подоцна беше осуден во низа корупциски скандали, по што заврши пет месеци во затвор и му беше одземено правото да се кандидира за политички функции. Тапи беше осомничен и за местење на фудбалски мечеви.
По излегувањето од затвор во 1997, тој влезе во шоу-бизнисот, работејќи со ТВ-шоуа, а во 2012 го купи весникот „Ла провенс“. Тапи уште го очекува судење за измама, кое треба да продолжи во мај.
