Трамп ќе се соочи со вистинските проблеми по напуштање на функцијата?

356

Доналд Трамп ги помина изминатите два месеца по неговиот изборен пораз во жестоко, но неуспешно оспорување на резултатите. Како можен мотив за неговата „борба против демократијата“ се наведува опасноста од соочувањето со бројни правни и законски проблеми по истекот на неговиот мандат на 20 јануари, пишува „Економист“.

Трамп би можел да се соочи со најсериозниот проблем во Њујорк, каде што локалното обвинителство истражува неколку можни финансиски прекршоци, вклучувајќи ги наводните исплати од страна на претседателот во заминување кон порно-актерката Сторми Даниелс и поранешниот модел на „Плејбој“ Карен Мекдугал во пресрет на претседателските избори во 2016 година. Поранешниот адвокат на Трамп, Мајкл Коен, моментно е во домашен притвор поради лажно сведочење пред Конгресот, како и за други криминални прекршоци, вклучувајќи ги оние поврзани со финансирањето на политичките кампањи. Тој тврди дека неговиот поранешен шеф му наложил да ги направи исплатите за Даниелс и Мекдугал, што Трамп го негира.

Обвинителот од Менхетн, Сајрус Венс, побара пристап до финансиските и даночни документи за осумгодишен период од сметководителот на Трамп. Американскиот претседател го оспори барањето, а Врховниот суд одлучи да не му даде пристап на обвинителството до документите додека не донесе одлука врз основа на последната жалба на Трамп. Венс очекува да добие пристап до документите кога Врховниот суд ќе ја отфрли жалбата, што одредени правни експерти сметаат дека би можело да се случи кога Трамп ќе го напушти Вашингтон.

Последиците би можеле да бидат сериозни по Трамп, бидејќи обвинителството сугерираше намера за проширување на истрагата. Доколку бидат пронајдени докази во документите, се спомнуваат потенцијални обвиненија за измама, фалсификување на бизнис-податоци, осигурителна и даночна измама. За дел од овие прекршоци е предвидена затворска казна до 25 години.

Згора, по сведочењето на Коен, обвинителството на Њујорк отвори истрага и за можни бизнис-измами во кои Трамп и неговите соработници од „Организацијата Трамп“ наводно, лажно ја претставиле вредноста на нивниот имот кога барале заеми, односно се сомничат дека прикажале помала вредност за да избегнат плаќање на данок. Синот на Трамп, Ерик, кој е потпретседател на компанијата, ги негираше ваквите тврдења.

Се спомнува можноста и дека Трамп би можел да се соочи со неколку приватни тужби, како оние од Џин Керол и Самер Зервос, кои го обвинуваат за сексуално вознемирување. Проблем за Трамп би можел да биде и телефонскиот разговор со државната секретарка на Џорџија на 2 јануари, во кој претседателот наводно барал да најдат речиси 12 илјади гласови кои би го смениле исходот од изборите во таа сојузна држава во негова полза. А можна е и истрага за телефонскиот разговор со украинскиот претседател Владимир Зеленски од јули 2019 година, во кој Трамп барал информации што би можеле да му наштетат на Хантер Бајден, синот на Џо Бајден.

– Додека ги поминува последните денови на функцијата, се смета дека Трамп би можел да дојде во искушение да издаде претседателско помилување за самиот себе, што досега ниту еден американски претседател не го сторил. Но дури и таквата постапка не би го ослободила потполно од законска одговорност. Соочувањето на Трамп со неговите постапки е неизбежно – заклучува „Економист“.

Уште не е јасно дали Трамп или членовите на неговото семејство ќе се соочат со криминални обвиненија, што ќе зависи од содржината на документите кои ги бара њујоршкото обвинителство.