Терористичките напади ја потпалија меѓурелигиската нетрпеливост во Шри Ланка

132

Поради минатомесечните терористички напади во Шри Ланка, земјата се уште не може да ги смири меѓурелигиските тензии во повеќето градови, објавува Си-ен-ен. Во еден од градовите кој беше нападнат за време на прославата на католичкиот Велигден каде најголем дел од населението е католичко, нападнати се продавници и вандализирани се автомобили на муслиманското население.

Ситуацијата ескалираше кога пред неколку дена во селото Порутота во близина на градот Негомбо избија немири меѓу возач-муслиман и група на католици кои сакале да му го проверат возилото. Ова недоразбирање се претворило во насилен протест, во кој потоа демонстрантите агресивно се однесувале на улиците, а притоа се уништени неколку излози на продавници, а запалени се и неколку возила.

Портпаролот на полицијата во Шри Ланка, Руван Гунасекара, на прес-конференција кажа дека две групи под дејство на алкохол биле одговорни за насилствата. По овие настани, полицијата во земјата распореди полиција во селото Порутота, а во вечерните часови беше воведен и полициски час, за полицијата да може да воспостави контрола.

Иако владата на Шри Ланка вети дека ќе ја надомести штетата предизвикана во ваквите „злосторства од омраза“, и муслиманските и христијанските лидери во земјата изразија загриженост дека постои можност за понатамошна ескалација на насилствата. За потсетување, координираните терористички напади на католичкиот велигден резултираа со 250 жртви и 500 повредени во повеќе градови во Шри Ланка.

Меѓурелигиската нетрпеливост и натаму трае во Шри Ланка, а полицијата и армијата распоредни свои сили на терен, поради можноста за појавување на понатамошни терористички напади и напади од одмазда.