Продолжен притворот на шефот на Амнести интернешнал во Турција

37

Турскиот суд денеска одлучи да му го продолжи притворот на локалниот претставник на Амнести интернешнал, соопшти меѓународната организација за човекови права.

Според пресудата, Танер Килич ќе остане зад решетки, а следното рочиште за случајот ќе биде во ноември.

Танер Килич се наоѓа во притвор веќе една година. Тој беше уапсен на 6 јуни 2017 година под обвинение за поврзаност со движењето на исламскиот проповедник Фетулах Ѓулен, кој според турските власти е организатор на обидот за државен удар во јули 2016 година.

На Килич заедно со уште 10 други активисти им се суди за помагање на три „терористички организации” – движењето на Ѓулен, Курдската работничка партија (ПКК) и левоекстремистичката Револуционерна партија и фронт за народно ослободување.