Моралес пристигна во Мексико

29

Досегашниот боливиски претседател Ево Моралес пристигна во Мексико, откако мексиканските власти му одобрија азил. Моралес ја напушти Боливија откако претходно поднесе оставка од функцијата, на што, пак, претходеа масовни и насилни протести од земјата, поттикнати од опозицијата, која го обвинуваше за изборни измами. Тој заминал во Мексико со авион на мексиканската влада од боливискиот град Чиморе.

Моралес, кој е првиот домородец претседател на Боливија, потврди на Твитер дека пристигнал во Мексико и порача дека го боли заминувањето од земјата од политички причини, но вети дека ќе се врати посилен и поенергичен. На социјалната мрежа тој објави фотографија на која се гледа како лежи под импровизиран шатор, направен од виолетово ќебе, и напишал како ја поминал својата прва ноќ во егзил.

– Ова беше мојата прва ноќ по напуштањето на претседателството и под принуда на државен удар. Им благодарам на своите браќа од сојузот Тропик оф Кокабамба на овозможената безбедност и нега – порача Моралес.

Пред да замине Моралес во Мексико, војската соопшти дека ќе ѝ се придружи на полицијата во патролирањето низ улиците, откако во протестите, кои се одржуваат во Боливија по изборите одржани минатиот месец, се уништени четири полициски станици.