Во Амазонија букнаа над 1.000 пожари за едно деноноќие

81

И покрај воведените мерки, бројот на пожари во бразилскиот регион Амазонија продолжува да расте.

Во девет бразилски држави кои граничат со Амазонија, бројот на пожари се зголеми за повеќе од 20 проценти во јули во однос на истиот месец минатата година, а тие податоци беа објавени од Националниот институт за вселенско истражување.

Институтот наведува дека 6.804 пожари се регистрирани во јули годинава, наспроти 5.318 во јули минатата година. Официјалните лица стравуваат дека 2020 година би можела да биде уште полоша од 2019 година за дождовните шуми во Бразил.

Само во четвртокот, сателитите снимија 1.007 пожари во Амазонија, што е рекордно во јули.

Во средината на јули, министерот за животна средина Рикардо Салес и претседателот Жаир Болсонаро го забранија палењето на растенијата во амазонскиот регион и во Пантанал – најголемото мочуришно подрачје на светот, во период од 120 дена.

Десничарскиот популист Болсонаро ја поддржува економската експлоатација на Амазонија. Тој беше жестоко критикуван за разорните пожари минатата година.

Го обвинуваат дека прифатил уништување за да отвори нови области за земјоделство, добиток и рударство.

Амазонија е најголемата прашума во светот, а научниците предупредуваат дека станува збор за клучна одбрана против климатските промени затоа што апсорбира гасови од стаклена градина.