Бев принуден да убијам толку многу невини луѓе, што престанав да ги бројам

571

Битката за заштита на децата во конфликтите

Кога борци на Исламската држава пристигнале во Мосул, Ирак, тие со себе донеле голем број ветувања и подобар живот. Но, наместо тоа, училиштата за кратко време биле затворени а жителите станале затрореници во сопствениот град, открива 12-годишниот Усама Салем, пренесува „Гардијан“. 

Џихадистите јавно егзекутирале деца, дел од нив ги регрутирале во нивните редови, а училиштата биле претворени во воени бази. Сега, за да стигне до училиштето, Салем мора да внимава да не настрада од неексплодирани бомби, како и да заобиколува купишта од урнатини сочинети од челик и скршено стакло.

– Бев шесто одделение кога училиштето се затвори. Бевме тажни. Покривот е пропаднат од воздушните напади на коалицијата што го ослободи градот во 2017 година – објаснува Салем. 

За време на воените конфликти се прекршува едно од основните права на децата – правото на образование. Засега, единствениот меѓународен договор за заштита на училиштата и универзитетите од напади и ограничување на нивната употреба за воени цели е необврзувачката „Декларација за безбедни училишта“ од 2015 година. Само 104 од 193 земји-членки на ООН ја потпишаа декларацијата. Израел, Русија и Саудиска Арабија, сите обвинети за напади врз училишта и болници, се меѓу оние кои не го сторија тоа.

Според ООН, во 2019 година биле извршени над 25.000 случаи на тешки престапи врз деца. Ова вклучува убиства, осакатувања, силувања и други форми на сексуално насилство, киднапирања и забрана за пристап до хуманитарна помош. Истата година, воени групи беа одговорни за две третини од сите тешки повреди на правата на децата и регрутирање на 7.747 деца како војници во Демократска Република Конго, Сирија, Сомалија и Јемен, додека преостанатата третина била регрутирана од страна на владините сили. 

Во јужен Судан, 15-годишниот Мојсеј бил сведок кога воена група го убила татко му, за подоцна истите убијци да го регрутираат и обучат да војува и да краде. Како иницијација, Мојсеј морал да егзекутира затвореник, а како награда добил „калашников“. Иако тој сега повеќе не е дел од милитантната банда, неговото ментално здравје е нарушено. 

– Бев принуден да убијам толку многу невини луѓе од мојата земја. Едноставно престанав да ги бројам, беа толку многу – објаснува Мојсеј со погледот свртен кон земјата, кој сега има 18 години.