Воведувањето на нов пристап во македонското џудо од страна на националната федерација претставува прифаќање на светските трендови во овој спорт. Новото раководство на федерацијата посветува големо внимание на психолошката подготовка и на исхраната на џудистите, со што забележливо е усвојувањето на иновативни методи. Користењето на иновативни методи во психолошката подготовка за големите натпреварувања му помогна на канадскиот национален џудо тим да се закити со еден златен и еден бронзен медал на Светското првенство во Токио годинава, а редовно освојува одличја и на гренслем и гранпри турнирите низ светот, со што евидентен е исклучителен напредок. 

– Во последните 10 години се менува и нашиот пристап за натпреварувањата. Се менува нашето, како и однесувањето на џудистите. Работиме на доближување на иновации во џудото, во поглед на психолошката подготовка на џудистите и на нивната исхрана. Сега имаме размена на информации и на искуства преку контактите со другите федерации, особено од регионот, што овозможува и подобра подготовка – истакна Миодраг Стојановиќ, генералниот секретар на македонската џудо федерација.

Индивидуалните совети претставуваат клуч за психолошка подготовка на младите спортисти и на нивните тренери. Нивната цел е да овозможат управување со психолошкиот аспект на нивното џудо за максимизирање на резултатите, односно да се извлече најдоброто од нивниот тренинг во полза на остварување на амбициите. Индивидуалните совети и поддршката се дадени од советничката за психологија, Ребека Тандариќ, мајстор џудо 3-ти дан. Според препораките на Канадскиот совет за спортска психологија во џудото, може да се помогне во повеќе области.

– Новото џудо ги надминува старите методи каде што се работеше исклучиво на техника и на сила. Обуките сега посветуваат големо внимание и на психолошката подготовка, особено бидејќи условите значително се разликуваат помеѓу натпреварувањата. На пример, помеѓу домашните и меѓународните натпреварувања каде што има побројна публика и поголем притисок. Подготовката е корисна бидејќи кај натпреварувачите може да дојде и до психолошка блокада, при која не знаат која техника да ја изведат, и покрај тоа што ја вежбале на тренинзите. Целта е џудистот да се доведе во одредена смирена психолошка состојба – објаснува Стојановиќ.

Тој додава дека исхраната е поврзана со психолошката подготовка, со што е подеднакво важна за џудистите.

– Исхраната е многу важна за џудистите, бидејќи цели кон постигнување на идеалната тежина за одредена тежинска категорија и подготвеност за натпреварувањата. Се користи специјална енергетска исхрана, за џудистите постепено да ја достигнат идеалната форма и тежина. При начинот на исхрана се земаат предвид и времето на борбата, односно можната појава на нервоза поради притисокот пред натпреварувањето. Затоа е важно да се едуцираат џудистите и тренерите – вели Стојановиќ кој е магистер по нутриционизам.  

Тандариќ препорачува процес од три чекори кој опфаќа процена на почетните потреби, програма за ментални вештини и следењето на напредокот. Почетната процена вклучува анализа на тековните ментални способности на спортистот. Процесот е исклучиво индивидуален бидејќи секој спортист е на различно ниво и има различни, специфични потреби. Почетната проценка на потребите вклучува тестови за психолошко профилирање и 30-минутно интервју. Сегашната технологија дозволува и работа и преку Скајп и Вибер.

– Процената се прави кај децата, бидејќи надворешното делување е полесно кај нив, односно помладите категории, отколку кај сениорите кои веќе имаат изградени навики и карактер – заклучува Стојановиќ. М.Ж.


Области во кои помага психолошката подготовка

  1. самодоверба
  2. мотивација
  3. соочување со негативени влијанија
  4. соочување со негативни емоции
  5. соочување со очекувани стравови
  6. контрола на движење
  7. соочување со сомневање во своите способности
  8. соочување со социјална вознемиреност
  9. управување со стресот
  10. вежби за концентрација
  11. фокус и обука за подигнување на свеста
  12. справување со неуспех
  13. именување и постигнување на целите
  14. справување со вознемиреност (особено пред натпревар)
  15. развој на рутина за конкуренција, управување со времето
  16. техники за учење кои можат да помогнат и во училиште и на колеџ
  17. справување со стрес
  18. помош со решавање на проблеми и донесување одлуки
  19. самоактуелизација на однесување
  20. напредок на спортската кариера
  21. помош при управување со транзиција