Ѓоковиќ и Федерер сега се први според бројот на недели (310) поминати на врвот на АТП-листата, а со следната листа Ѓоковиќ ќе стане нов рекордер во таа категорија
ТЕНИС – АТП-ЛИСТА
Најдобриот тенисер на светот, Србинот Новак Ѓоковиќ го изедначи рекордот на Швајцарецот Роже Федерер според бројот на недели (310) поминати на врвот на АТП-листата, а веќе в понеделник официјално ќе стане апсолутен рекордер, со 311 седмици на врвот на светската листа.
Ѓоковиќ првпат загосподари на врвот на АТП-листата на 4 јули 2011 година, со 24 години и 43 дена, а од 7 јули 2014 година до 6 ноември 2016 година помина 122 недели во низа на првото место. Ѓоковиќ во моментов има играчки ефект од 387 победи и 53 порази кога настапувал како светски рекет број еден, а против тенисерите од врвните 10 на АТП-листата има скор од 117 победи и 30 порази и скор од 39-13 во финалињата на АТП-турнирите, пишува Асоцијацијата на тениските професионалци (АТП) на својата интернет-страница.
По освојувањето на гранслем-турнирот Австралија опен неодамна, по деветти пат, Ѓоковиќ има 18 гранслем-титули, две помалку од Шпанецот Рафаел Надал и од Федерер. Ѓоковиќ е и еден од 26-те тенисери што биле први на АТП-листата од 1973 година. Минатата година тој шести пат ја заврши годината како прв тениски рекет во светот и со тоа го израмни рекордот на Американецот Пит Сампрас.
Сампрас, пак, е третиот тенисер според бројот на недели поминати на врвот на АТП-листата, со вкупно 286 седмици на првото место во светот, потоа следуваат Чехот Иван Лендл со 270, Американецот Џими Конорс со 268, Надал е со 209 недели…
НАЈМНОГУ НЕДЕЛИ НА ВРВОТ НА АТП-ЛИСТАТА
Новак Ѓоковиќ 310
Роже Федерер 310
Пит Сампрас 286
Иван Лендл 270
Џими Конорс 268
Рафаел Надал 209
