На Тур де Франс се користи дозволен допинг?

53

Велосипедистите користат кетони, кои се дозволени супстанции, но еден од тимовите што не ги користи вели дека нема ефект од нивната употреба

Употребата на кетонскиот „чудесен пијалак“ е една од централните теми на годинашниот Тур де Франс. Тимот Џамбо-Визма, чии велосипедисти победија на четири етапи, потврди дека тие користеле кетони, диететски додаток во исхраната, кој наводно помага во подобрувањето на издржливоста на возачите, пишува специјализираниот интернет-сајт за велосипедизам, „Сајклинг викли“.

Ричард Плуге, шефот на тимот Џамбо-Визма истакнува дека супстанцијата што се користи како и другите витамини, не е на забранетата листа, и оти ја користат и другите тимови. Лани седум од 22-та тима признале дека имале корист од употребата на таа супстанција.

Кетоните не се на листата на забранети супстанции на Светската антидопинг-агенција (ВАДА) и се употребуваат на тој начин што возачите ги мешаат со нивните пијалаци. Џамбо-Визма за холандскиот весник „Де телеграф“ потврди дека употребува кетони, а весникот објави и студија во која се истакнува дека супстанцијата може да ги подобри перформансите на корисникот. Тестот го направил професорот Питер Хеспел на лицата што го користеле при возење на мини-трката Тур де Франс.

Професорот Питер ван Ено, директорот на ВАДА-лабораторијата во Гент, Белгија, која е задолжена да известува за евентуално користење допинг, вели дека нема ништо лошо во користењето кетони, кои природно ги создава црниот дроб.
– Таа супстанција не е на листата на допинг, бидејќи истрагата околу несаканите ефекти уште е во тек. Сѐ додека негативните ефекти не можат веднаш да се демонстрираат, таа нема да биде на листата за допинг – вели Ено.
Но еден од тимовите што не користи кетони, Санвеб, вели дека нема ефект од нивната употреба.

– Сметаме дека треба да има повеќе јасност за ефектите на овој лек врз здравјето на спортистот на долг рок. Освен тоа, има многу нејаснотии околу ефикасноста. Има дури и студии, кои покажуваат дека има негативен ефект врз перформансите, и оти е добар само за закрепнување. Сакаме да бидеме сигурни дека нема да им наштетиме на нашите возачи – вели докторот на германскиот тим, Анко Боленс.