Надал се повлече од Лејвер купот, нема да игра двојки со Федерер

73

Рафаел Надал се повлече од своите мечеви на Лејвер купот во Швајцарија поради повреда на зглобот, потврдија од турнирот.

– По консултациите со докторот на натпреварувањето, Рафаел Надал се повлече од денешните мечеви поради повреда на зглобот – се вели во соопштението на Лејвер купот.

Надал, кој ја освои четвртата титула од САД опен овој месец, требаше да игра во поединечна конкуренција против Ник Кирјос и заедно со Роже Федерер во двојки. Наместо него, Стефанос Циципас ќе игра заедно со Федерер, додека Доминик Тим ќе го замени во дуелот против Кирјос.

Ова е лоша вест за Европа, чиј тим вчера загуби два меча, но сепак води со 7-5 против Остатокот од светот.

– Фантастично е да се игра на Лејвер купот и разочаран сум што нема да можам да играм денеска. Но, имам воспаление на зглобот и морам да се одморам. Атмосферата во Женева е фантастична и ќе бидам тука за сите мои соиграчи – вели Надал.