Дуплантис сега е апсолутен рекордер

97

Швеѓанецот Арманд Дуплантис (20) го собори 26 години стариот светски најдобар резултат во скок со стап на отворено на Украинецот Сергеј Бубка (6,14 метри, поставен во 1994 година), прескокнувајќи 6,15 м на митингот од Дијамантската лига во Рим.

Со тоа сега тој е апсолутен рекордер, иако Светската атлетика (СА) од 2000 година не прави разлика помеѓу рекорди во затворен и отворен простор. Дуплантис во сала годинава на гранпри-митингот во Глазгов (Шкотска) прескокна 6,18 метри, со што за еден сантиметар го поправи сопствениот светски рекорд.

Бубка (56) доминираше во 1980-тите и во 1990-тите години. Тој освои 10 светски титули, олимписко злато (1988), двапати беше европски првак, а го соборуваше светскиот рекорд дури 35 пати (17 на отворено и 18 во сала). Дуплантис тренира скок со стап од својата четврта година, на седум години поставил рекорд во таа возрасна категорија (3,86 м), подоцна поставил рекорди и на 11 и 12 години, а го држи и рекордот под 20 години (6,05 м) од ЕП 2018. Г.И.