Македонската јуниорска репрезентација одигра нерешено против Италија 27-27, на ЕХФ шампионатот, дивизија Б, за ракометари до 20 години, што се одржува во Скопје.
Првите 20-тина минути од натпреварот се играше гол за гол, а избраниците на селекторот Данило Брестовац до крајот на полувремето успеаа да поведат и на паузата заминаа со минимална предност од еден гол 13-12.
Во почетокот на вториот дел македонските ракометари ја зголемија предноста на 16-13, но Италијанците направија серија и стигнаа до водство од 19-18, во 44-та минута.
До крајот на натпреварот италијанската репрезентација ја имаше иницијативата на теренот и резултатската предност, иако македонските ракометари успеваа да се доближат и да израмнат.
Во последната минута од натпреварот Италија имаше водство од еден гол (27-26), но Мице Шилегов беше прецизен за реми.
Македонија со победата над Велика Британија и овој нерешен резултат е на второто место на табелата во групата Б.
