На изминатите 13 ЕП, шест репрезентации се искачиле на највисокото место на победничкиот пиедестал, од нив Шведска има четири златни медали, Франција има три, Германија и Данска по два, а по една титула имаат Шпанија и Русија
Со денешните мечеви Белорусија – Србија (пренос на ТВ Телма) и Германија – Холандија (од 18.15 ч.) во групата А и Хрватска – Црна Гора (пренос на ТВ Телма) и Шпанија – Летонија (двата меча од 20.30 часот) од групата Ц ќе почне 14-то Европско првенство за мажи, кое првпат се игра во три држави и е прво на кое учествуваат 24 репрезентации. Својот прв меч на ЕП 2020 Македонија го игра утре (20.30 ч), со Украина, потоа в недела (16 ч.) е дуелот со Чешка, а во вторник (18.15 ч) со домаќинот Австрија.
Селекторите на Франција и на Словенија, Дидие Динарт, односно Љубомир Врањеш, се единствени меѓу селекторите што имаат европски титули како играчи и што на ова ЕП би можеле да станат први во историјата на ЕП што би ја освоиле титулата и како играч и како тренер. Слична можност за историја имаат и селекторите на Австрија и на Русија, Алеш Пајович и Едуард Кокшаров, кои како играчи имаат освоено сребрени медали (Пајович со Словенија во 2004 година, а Кокшаров со Русија во 2000-та).
На изминатите 13 првенства, шест држави се искачиле на највисокото место на победничкиот пиедестал. Шведска има најмногу (четири ) златни медали, втора е Франција со три, Германија и Данска имаат по две, а по една титула имаат Шпанија и Русија.
Данска и Франција се единствените што со своите национални тимови освоиле злато и во машка и во женска конкуренција. Данска има шанса да стане втората репрезентација што во исто време би била сопственик на сите – олимписката, светската и европската титула. Таа селекција славеше на СП 2018 и на ЛОИ 2016. Претходно Франција во два наврата беше троен првак.
Шпанија е земја со најмногу освоени медали на ЕП, седум, од кои еден златен (2018), четири сребрени (1996, 1998, 2006 и 2016) и два бронзени (2000 и 2014). Шест медали има Данска, а по четири медали имаат Франција, Хрватска и Шведска.
Најдобри меѓу стрелците Лазаров, Странд и Сигурдсон
Сопственик на рекордот за најдобар стрелец во историјата на европските првенства (ЕП) е македонскиот капитен Кирил Лазаров, со 61 постигнат гол на ЕП 2012 во Србија. Норвежанецот Кјетил Странд со 19 реализации е рекордер според бројот на постигнати голови на еден меч. Исланѓанецот Гудјон Валур Сигурдсон е рекордер меѓу ракометарите по бројот на учества и по бројот на вкупно постигнати голови на ЕП. Својот прв настап на ЕП го имал во 2000 година и за него ова ќе биде 11-ти шампионат. На претходните 10 првенства Сигурдсон постигнал 270 гола. Втор на листата стрелци на ЕП е францускиот репрезентативец Никола Карабатиќ со 256, а трет е Швеѓанецот Стефан Ловгрен со 203 погодока.
