Ракометарите на Металург се пласираа во новоформираната Лига на Европа, добивајќи го двомечот од второто квалификациско коло против швајцарски Кринс Луцерн со вкупен резултат 47-46.

Македонскиот претставник претрпе минимален пораз на вечерашното гостување во Цирих 21-22, но стекна учество во групната фаза на континенталното натпреварување благодарение на победата во Скопје од 26-24 пред седум дена.

Даниел Дупјачанец беше одличен на голот на Металург забележувајќи 13 одбрани. Најефикасен во екипата од Автокоманда беше Бранко Канкараш со пет гола, а го следеа Златко Хорват и Марко Тарабокија со по четири погодоци.

Металург имаше и поддршка од група македонски навивачи кои го бодреа во текот на неизвесниот меч во Цирих.

Металург на 1 октомври ќе ги дознае противниците во групната фаза, во која ќе учествува и Еурофарм Пелистер.