Металург вечерва против дебитантот Стеауа

177

Романска Стеауа ќе биде денешниот предизвик за ракометарите на Металург (17.15 часот, пренос на МТВ), која ќе им гостува во спортскиот центар „Борис Трајковски“ во Скопје, во 8-то коло од Регионалната лига (РЛ). Со оглед на ефектот по седум кола, четири победи (Татран, Војводина, Мешков и Извиѓач) и три порази (Загреб, Вардар и Нексе), дебитантот ќе ја има улогата на фаворит. Но двете врзани победи на Металург (над Татран во РЛ со 30-28 и над Чеховски во ЛШ со 25-24), дополнети со новата енергија на трите засилувања, Александар Шпенде, Миха Пучник и Гонзало Риберио, му даваат за право на Металург да се надева на уште една добра игра и позитивен резултат.

– Има најава дека Стеауа ќе дојде со вториот тим, но наша задача е да се подготвиме за нивното најдобро издание и да одиграме максимално, без разлика со каков тим ќе излезат на теренот. Можам да кажам дека шансите се 50-50, но ако ја одиграме нашата игра, верувам во позитивен исход – изјави Данило Брестовац, тренерот на Металург.

Кај романскиот тим клучната улога ја има бековската тројка Хавиер Хумет (32 гола), Марин Вегар (21 гол) и Крсто Милошевиќ (17 погодок), а одлично ги дополнуваат крилата Алин Росу и Габриел Флореа и пикерот Немања Грбовиќ (сите по 15 гола).