Македонија со триумф над домаќинот го освои „Трофеј Карпати“

133

Ракометната репрезентација на Македонија со подмладен состав успеа да ја совлада Романија со 24-20 (10-12) и да го освои подготвителниот турнир „Трофеј Карпати“, во пресрет на Европското првенство во јануари 2020 година.

Без големи промени во составот, избраниците на Данило Брестовац губеа на стартот на мечот со 2-5 и 4-6, а Романија имаше и предност од 12-10 на полувремето. Во второто полувреме, Македонија со подобра игра стигна до водство од 16-15, кое го зголеми на предност од два гола (18-16), предводена од одличниот Митревски на голот (забележа 16 одбрани).

Романците успеаја да израмнат на 20-20, но Поповски и Маџовски ја вратија предноста од два гола (22-20), која Македониа ја зголеми на четири гола до крајот на мечот.

Танкоски беше најефикасен со осум постигнати голови, додека Маркоски додаде четири за импресивна победа на подмладениот состав.

Танкоски е прогласен за најдобар ракометар на турнирот, а Митревски за најдобар голман.

Комбинираниот состав во досегашниот тек од подготовките забележа победи над Кувајт, Алжир и над Романија, како и еден пораз од Кувајт.