Две групи од Купот во Скопје, една во Битола

263

Со полудиригирана ждрепка во просториите на Ракометната федерација на Македонија (РФМ) беа извлечени четвртфиналните групи за Купот на Македонија. Носителите во групите, Вардар и Металург, и двете најдобропласирани екипи од есенскиот дел на првенството, Еурофарм Работник и Пелистер, ги добија противниците за четвртфиналните дуели за пласман на завршницата на Купот на Македонија.

Еурофарм како носител на групата 1 ќе го организира турнирот, а негов противник во полуфиналето ќе биде Охрид. Другата полуфинална двојка ја сочинуваат Аристон и Вардар јуниор. Металург е носител и домаќин на групата 2, а за противник во првиот меч ќе го има тимот на Јуниор Кисела Вода. Во втората полуфинална двојка ќе се сретнат Радовиш и Пролет.

Домаќинството во групата 3 го зеде екипата на Бутел, која во полуфиналето ќе игра со Тиквеш, а противник на носителот Пелистер ќе му биде Борец. Четвртата група, чиј носител е бранителот на Купот Вардар, е без организатор, така што првиот полуфинален меч помеѓу Вардар и Прилеп ќе се игра во Скопје, а вториот меч Струга – Металург 2 во Струга. Финалето ќе се игра на теренот на победникот од мечот во Струга.

Овие мечеви е предвидено да се играат на 20 и 21 април, веднаш по завршувањето на репрезентативните обврски на ракометарите.