Во драматичен финиш, Вардар извлече бод против Мешков

440

Ракометарите на Вардар го впишаа првото реми во годинашнава Лига на шампионите (ЛШ), откако вечерва во спортската сала „Викторија“ во Брест, во рамките на 9. коло, во драматичен и неизвесен финиш, успеаја да освојат бод против белорускиот шампион Мешков, играјќи 31-31. Ова беше вкупно четврти меѓусебен дуел на двете екипи во ЛШ, а резултатот е 2-1 за Вардар, со едно реми. Во некомплетното коло во групата А, Вардар, сега има 11 бода и рипна од петтото на третото место, додека Мешков има пет.

Посебно беше драматично второто полувреме. Белорусите имаа предност од шест гола (27-21) на 13 минути до крајот, но избраниците на тренерот Роберто Парондо, успеаја да изнајдат сили и со голот на левиот бек Кристиан Дисингер да израмнат на 12 секунди до крајот. Вториот дел Мешков добро го почна и со два погодока во низа за првпат поведе со три гола (16-13), а потоа и со четири (18-14). Вардар на петпати се прибижи на гол-негатива (18-19, 19-20, 28-29, 29-30, 30-31), но во последниот обид, кога беше и најпотребно, успеа да израмни.

Првото полувреме минимално со еден гол разлика (14-13) го добија Белорусите, кој во поголемиот дел имаа предност од еден до два гола. Вардар израмни на почетокот (2-2), а истото го стори и во 23-та минута (9-9), од вкупно шесте израмнувања во овој дел. Со голот на десното крило Иван Чупиќ, црвено-црните за првпат поведоа во 27-та минута (12-11), што беше и единствено водство на средбата. Сепек, наместо скопјани да одат на одмор со гол-предност, во брзоплета контра, дозволија домаќинот да се стекне со позитива од еден гол (14-13).

Данската судиска двојка со чуден критериум во второто полувреме, а во 43-та минута престрого му додели директен црвен картон на пикерот на Вардар, Глеб Калараш, кога вардарци имаа негатива од три гола (20-23).

Најефикасен кај Вардар беше десниот бек Даинис Кристопанс со осум гола од девет обида, а кај домаќинот десното крило Дарко Ѓукиќ со седум погодоци. Солиден на голот беше и вардаровиот голман Дејан Милосављев со 10 одбрани, додека вториот голман Калифа Гедбан впиша шест и сите во вториот дел.

Следниот натпревар Вардар го игра на 1. декември во Скопје против полски Киелце.