Собрани во Њупорт Риџ, каде што постојано се зголемува бројот на свеќи, цвеќиња, балони и други предмети синоќа, колегите и соседите на Коби Брајант, ги споделуваа своите сеќавања за легендарниот кошаркар кој го загуби животот во хеликоптерска несреќа, пишува „Лос Анџелес тајмс“.
Тие зборуваа за Коби како татко чија посветеност и љубов беа очигледни за секој што го сретнал. Кошаркарот познат под прекарот „црната мамба“ имаше четири ќерки со неговата сопруга Ванеса, со која беше во брак од 2001 година. Во несреќата со Брајант загина и неговата тринаесетгодишна ќерка Џиана.
Тие зборуваа за идолот Коби – чии достигнувања беа легендарни.
Тие зборуваа за стандардите што ги постави Коби – чија епска потрага по големи успеси беше пример за сите.
Но, тие исто така зборуваа и за човекот чија слава никогаш не влијаеше на начинот на кој тој топло се поздравува во локалната самопослуга.
Сепак, повеќе од што било, тие зборуваа за поврзаноста со Коби, кој беше толку сакан и вкоренет во заедницата, што неговата смрт собрала повеќе од 100 луѓе на бдеење со свеќи во студената зимска ноќ во Њупорт Риџ Комјунити Парк.
До крајот на бдеењето, присутните се здружија и во препевот на „неверојатна милост“ и во познатото скандирање на „Коби! Коби! Коби!“
