Кливленд бил оштетен во првиот меч против Голден стејт

125

НБА лигата го објави извештајот поврзан со судиските одлуки во последните две минути од регуларниот дел на првиот финален натпревар меѓу Голден Стејт вориорс и Кливленд кавалирс.

Во извештајот е нагласено дека судиите во последните две минути донеле повеќе неточни одлуки на сметка на Кливленд, а натпреварот во регуларниот дел заврши 107-107, но Голден Стејт славеше по продолженијата со резултат од 124-114.

Во извештајот се нотира дека на 12 секунди до крајот Дрејмонд Грин го фатил Леброн Џејмс за рака додека тој одел кон кошот, но судиите или не виделе, или намерно не досудиле прекршок.

Исто така Грин, по второто промашено слободно фрлање на Џорџ Хил, предвреме влегол во рекетот и направил престап, но и тоа не е досудено.

Меѓутоа, од НБА потврдија дека судиите биле во право на 36 секунди пред крајот, кога ја променија првичната пресуда и од фаул во напад на Кевин Дурент досудија прекршок во одбрана на Леброн поради што Кливленд реагираше.

Вториот натпревар од финалната серија повторно се игра во Оукленд.