Рома победи во првата сезона на Конференциската лига, а Мурињо стана првиот тренер што ги освоил сите три актуелни големи европски клупски натпреварувања, прв со европски трофеи со четири клуба, постигна пет победи во исто толку европски финалиња и еден од тројцата тренери што освојува европски трофеи во три децении
ФУДБАЛ
Жозе Мурињо уживаше во поголеми достигнувања во својата блескава тренерска кариера, но триумфот на Рома во фудбалската Конференциска лига (КЛ) го доведе до солзи откако му го донесе на италијанскиот клуб првиот голем европски трофеј, пишува „Би-би-си“. Рома, трипати првак на Италија и девет пати освојувач на Купот на таа земја, го победи Феенорд, во Тирана, со 1-0, во финалето на првата сезона на КЛ. Мурињо стана првиот тренер што ги освоил сите три актуелни големи европски клупски натпреварувања, има пет победи во пет европски финалиња и е првиот тренер со европски трофеи со четири клуба. Тој претходно победи со Порто во Лигата на шампионите (ЛШ) и во Лига Европа (ЛЕ), со Интер во ЛШ и со Манчестер јунајтед во ЛЕ.
– Фудбалот се игра за победа, а Мурињо победува. Тој е сериски победник – изјави поранешниот играч од средниот ред на Манчестер јунајтед, Овен Харгривс за „БТ спорт“, пренесе „Би-би-си“.
Мурињо воспостави дух и заедништво со кои Рома го освои првиот трофеј по 14 години, пишува „Би-би-си“.
– Да се победи е многу тешко. Ви требаат многу состојки. Нашиот тим одигра 55 меча, до финалето стигнавме уморни, но го држевме тоа скриено. Ова е фантастична група играчи – вели Мурињо, пренесе Европската фудбалска унија (УЕФА) на својата интернет-страница.
Ова беше 26-ти трофеј во тренерската кариера на Мурињо, 19 години по победата со Порто во тогашниот Куп на УЕФА (сега ЛЕ).
– Одличното нешто во мојата кариера е тоа што, освен Лигата на Европа со Манчестер јунајтед, тоа што го направив со Порто, Интер и со Рома е многу, многу, многу посебно. Едно е да се победи кога сите го очекуваат тоа, кога направивте инвестиции за да победите, но сосема друго е да победите кога тоа се чувствува навистина посебно. Ова останува во историјата на Рома, но и во мојата. Ми кажаа дека само јас, сер Алекс Фергусон и Џовани Трапатони сме освоиле трофеи во три различни децении. Тоа ме прави да се чувствувам малку стар, но тоа е убаво за мојата кариера – рече Мурињо, пренесе „Би-би-си“.
Рома и Феенорд во следната европска сезона ќе играат во групната фаза на ЛЕ, каде што се пласираа со пласманот во домашните првенства.
Во „хеттрик-клуб“ со Трапатони и со Латек
Жозе Мурињо со триумфот со Рома во фудбалската Конференциска лига влезе во елитното друштво тренери со триумфи во три различни европски клупски натпреварувања. Португалецот претходно освои по два трофеја во Лигата на шампионите (ЛШ), со Порто во 2004-та и со Интер во 2010 година, како и во Лига Европа (ЛЕ), со Порто во 2003-та и со Манчестер јунајтед во 2017 година.
Европски хеттрик-купови како тренери остварија и Италијанецот Џовани Трапатони и Германецот Удо Латек. Трапатони славеше во Купот на шампионите (сега ЛШ) со Јувентус (во 1985 година), во Купот на УЕФА (сега ЛЕ) со Јувентус (1977 и 1993 година) и со Интер (1991) и во некогашниот Куп на победниците на куповите (КПК), кој пред 23 години се спои со Купот на УЕФА, со Јувентус (1984). Латек, пак, победи по еднаш во сите три купа, и тоа со Баерн беше европски првак во 1974 година, со Борусија (М) победи во Купот на УЕФА во 1979 година и со Барселона во КПК во 1982 година.
Мурињо освојува европски трофеи во три децении, како и Трапатони и Алекс Фергусон (победуваше во 1983, 1991, 1999 и во 2008 година).
СИТЕ ТРОФЕИ НА МУРИЊО
Лига на шампионите 2
Лига Европа 2
Конференциска лига 1
домашно првенство 8
домашен куп 4
домашен лига-куп 4
домашен суперкуп 5
Вкупно: 26
Со Порто (шест): Лига на шампионите, Лига Европа, првенство (двапати), Куп и Суперкуп на Португалија
Со Челси (осум): првенство (трипати), ФА-куп, Суперкуп и Лига-куп на Англија (трипати)
Со Интер (пет): Лига на шампионите, првенство (двапати), Куп и Суперкуп на Италија
Со Реал Мадрид (три): првенство, Куп и Суперкуп на Шпанија
Со Манчестер јунајтед (три): Лига Европа, Лига-куп и Суперкуп на Англија
Со Рома (еден): Конференциска лига
СИТЕ ФИНАЛИЊА ВО ЕВРОПСКИТЕ КУПОВИ НА МУРИЊО
ГОД. ДВОЈКА РЕЗ. КУП
2003 Порто – Селтик 3-2 Лига Европа
2004 Порто – Монако 3-0 Лига на шампионите
2010 Интер – Баерн 2-0 Лига на шампионите
2017 Манчестер ј. – Ајакс 2-0 Лига Европа
2022 Рома – Феенорд 1-0 Конференциска лига
