ФУДБАЛ
Според претседателот на шпанската Ла лига, Хавиер Тебас, Реал Мадрид, Барселона и Јувентус би можеле да формираат нова европска суперлига, пишува шпанскиот дневен спортски весник „Марка“. По негативните реакции од многу страни, оригиналната суперлига пропадна само по неколку дена од најавата за формирање во април.
По големите протести, големата шесторка од Премиер-лигата, Манчестер јунајтед, Манчестер сити, Ливерпул, Арсенал, Челси и Тотенхем, се повлече, а по нив Атлетико, Милан и Интер.
– Барселона, Реал Мадрид и Јувентус разговараат и се договараат за ова и можам да ви кажам дека тие знаат оти Англичаните нема да им се приклучат. Тие планираат да формираат нова суперлига со клубови од други лиги во Европа. Суперлигата што ја видовме во април не ме загрижува, но ме загрижува концептот. Тие веруваат дека големите клубови мора да владеат во фудбалот. Има многу себичност во тоа. Точно е дека тие се големи, но како станаа толку големи? Натпреварувајќи се против Осасуна, Бетис и другите помали клубови, но не можат да ги отфрлат настрана толку лесно – изјави Тебас за „Марка“.
