Финалистите од 2014-та само со победи може да останат во Русија

58

Денеска почнуваат дуелите од третата рунда на фудбалското СП, која треба да ги потврди репрезентациите што веќе си обезбедија пласман во нокаут-фазата и да даде одговори на тоа дали некои од фаворитите порано ќе заминат од Русија.
Ова најмногу се однесува на двократниот светски првак и актуелен вицепрвак Аргентина. По првите две кола „гаучосите“ имаат само еден бод и на утрешниот меч против Нигерија им е потребна победа за пласман меѓу 16-те најдобри, но и пораз или реми на Исланд од Хрватска, која веќе се квалификува во следната рунда.
Бранителот на титулата Германија беше пред амбис, го загуби првиот меч, но успеа да се извлече и во второто коло да слави победа. Во третото коло Германија би требало да има полесна задача, игра со Јужна Кореја, која веќе е елиминирана, а Шведска со Мексико. Тука може да има израмнети селекции, па дополнително да се одреди кој ќе игра во осминафиналето. На Германија за сигурен пласман ѝ треба победа со барем два гола разлика.
Неизвесно е и во групата Е каде што Бразилците се први со четири бода, а по три имаат Швајцарија и Србија. Србија мора најмалку да ремизира со Бразил, но можно е тоа да биде недоволно бидејќи Швајцарците имаат полесна задача, играат против Костарика, која веќе се пакува за дома.