Улиците на Буенос Аирес се претесни за оние што сакаат да се збогуваат од Марадона

89

Улиците на аргентинската престолнина Буенос Аирес се претесни за обожавателите што сакаат да му кажат последно збогум на фудбалскиот ас Диего Армандо Марадона.

Ковчегот со телото на Марадона е изложен во Розовата куќа (Каса Росада), претседателската палата во срцето на аргентинскиот главен град.

Аргентинците скршени од болка ја испраќаат фудбалската легенда по тажната вест што беше објавена вчера, а се проценува дека милион луѓе ќе му оддадат почит на поранешниот фудбалер.

Збогувањето со Марадона почна во 12 часот, а голем број луѓе се собраа со часови порано за да добијат шанса да се простат од легендарниот фудбалер. Сепак, се случи и инцидент кога некои од граѓаните се судрија со полицијата во обид да ја пробијат оградата.

И обезбедувањето пред ковчегот имаше проблеми зашто некои од граѓаните сакаа да се приближат, но тоа не им е дозволено.

Насобраните обожаватели поминуваат низ Розовата куќа и се збогуваат со Марадона за што нема многу време, бидејќи луѓето може да поминат само покрај ковчегот меѓу кој има ограда.