Ибрахимовиќ во друштво на Меси и Роналдо во Клуб 500

207

Поранешниот шведски репрезентативец Златан Ибрахимовиќ (37) стана третиот активен фудбалер што во својата кариера постигнал 500 гола.

Во натпреварот од Американската фудбалска лига (МЛС) меѓу Лос Анџелес Галакси и Торонто, Ибрахимовиќ го постигна својот 500-ти погодок во кариерата, и тоа од свртување со надворешниот дел од стапалото. Тоа е негов 17-ти погодок во 22 одиграни меча во МЛС-лигата, откако на почетокот на сезоната стана член на тимот на Лос Анџелес галакси.

Освен Ибрахимовиќ, 500 и повеќе гола меѓу активните фудбалери имаат постигнато само Аргентинецот Леонел Меси и Португалецот Кристијано Роналдо.

Од своите 500 гола, Ибрахимовиќ постигнал 62 во 116 настапи за шведската репрезентација, а преостанатите ги постигнал на клупско ниво за Малме (18 гола), Ајакс (48), Јувентус (26), Интер (66), Барселона (22), Милан (56), ПСЖ (156), Манчестер јунајтед (29) и Лос Анџелес галакси (17).

За жал, неговиот гол не помогна Галакси да забележи победа во дуелот со актуелниот првак во МЛС, Торонто, кој на крајот славеше со 5-3.