Гибралтар по 22 пораза врза две победи по ред

139

За нова сензација во четвртата рунда натпревари во фудбалската Лига на нациите (ЛН) повторно се погрижи Гибралтар, со втората победа по ред, дома, над Лихтенштајн (со пресврт), со 2-1, и првпат постигна два гола на еден натпревар. Гибралтар во саботата триумфира и на гости над Ерменија (1-0) и сега има шест бода и теоретски шанси за освојување на првото место во групата 4, лига Д, во која е и Македонија. До сензационалниот триумф над Ерменија, во периодот од септември 2014 до септември 2018 година, Гибралтар претрпе 22 пораза со вкупна гол-разлика 5-107. Во двата меча во октомври ги забележа двете победи, постигна три и прими само еден гол.

Од другите дуели во ЛН, за издвојување е четвртиот триумф на Грузија, над Летонија (3-0), во групата 1, лига Д. На две кола до крајот тие обезбедија пласман во лига Ц, како и бараж-дуел за настап на финалниот турнир за Европското првенство (ЕП) во 2020 година. Пласман во повисок ранг, во лигата А, обезбеди Украина со триумфот над Чешка (1-0), трет на трите натпревари. Чешка и Словачка во меѓусебната пресметка идниот месец ќе решаваат која од двете селекции ќе испадне во третата по квалитет лига Ц.