Четврта титула за Фајдек

84

Зоран Михајлов
специјално од Доха за „Нова Македонија“

Во фрлање кладиво Полјакот Павел Фајдек ја потврди фаворитската улога. Тој во последниве години, поточно од СП во Москва во 2013 година, е вистински господар во својата дисциплина. Фајдек и овде ги декласира ривалите и ја освои 4-тата титула светски првак едноподруго. Неговиот победнички резултат беше 80,50 метри. Втор беше Французинот Квентин Биго, кој фрли 78,19 метри и само за еден сантиметар беше подобар од третопласираниот Бенце Халаш од Унгарија.Шестиот ден на СП во атлетика во Доха не обилуваше со многу финални дисциплини, но и оние три што беа на програмата им приредија задоволство на гледачите.

Американецот Грант Холовеј, кој е водечки на светската ранг-листа на 110 метри со пречки, во Доха ја потврди лидерската позиција и победи со 13,10 секунди. Искусниот
Русин Сергеј Шубенков, кој настапува како независен спортист, во финишот стигна до сребрениот медал со резултат од 13,15 секунди, а бронзата ја освои Паскал Мартино Лагард од Франција со 13,18 секунди.

Во трката на 200 метри за жени според очекувањата, во отсуство на првите три од годинашнава ранг-листа, победи Британката Дина Ашер-Смит. Таа постигна резултат од 21,98 секунди, што беше доволно за триумф и златен медал. Инаку, Ашер-Смит од првите метри изби на првата позиција и беше јасно дека ќе ја зачува предноста до крајот. Втора низ целта мина Бритни Браун од САД со 22,22, а трета е најпријатното изненадување Мијинга Камбунџи од Швајцарија со 22,51 секунди.