Порака по ЗОИ – нови хоризонти и подобар свет

116

Во Пјонгчанг видовме дека спортот може да го направи светот подобар. Ова се игри што отворија нови хоризонти, рече Томас Бах, претседателот на Интернационалниот олимписки комитет (ИОК)

Нови хоризонти и подобар свет е главниот впечаток и најголема придобивка од Зимските олимписки игри (ЗОИ) во Пјонгчанг, Јужна Кореја, според зборовите на Томас Бах, претседателот на Интернационалниот олимписки комитет (ИОК).
– Во Пјонгчанг видовме дека спортот може да го направи светот подобар. Ова се игри што отворија нови хоризонти – рече Бах.

За тоа дека Игрите во Пјонгчанг се Игри на нови хоризонти, зборува и фактот што на свечената церемонија за затворањето на Игрите во ложата беа високи претставници на многу земји, како претседателот на Јужна Кореја, Мун Јае-ин и заменик-претседателот на централната комисија на владејачката работничка партија на Северна Кореја Ким Јонг-чол.

– Игрите во Пјонгчанг завршија, но времето на мир ќе продолжи во Кореја, ќе продолжиме со нашите напори да ги прошириме хоризонтите на мирот што почна во Пјонгчанг – порача Мун.

Дваесет и третите Зимски олимписки игри ќе останат забележани по многу спортски дострели, а многу од нив беа постигнати од олимпијки. Една од ѕвездите на ЗОИ беше Естер Ледецка (22), која во Пјонгчанг се натпреваруваше во два различни спорта, алпско скијање и сноуборд, и во двата стигна до златни медали. Во два различни спорта (брзо лизгање и брзо лизгање на кратки патеки) се натпреваруваше и Холанѓанката Јориен Тер Морс и во двата се закити со медал (злато и бронза). Морс беше првата спортистка со медали во два спорта на едни ЗОИ, а Ледецка стана првата жена со олимписки титули во два спорта на едни ЗОИ и трета воопшто (заедно мажи и жени).

Норвежанката Марит Бјорген (37), пак, стана рекордерка по бројот на освоени медали (осум златни, четири сребрени и три бронзени) во историјата на ЗОИ. Таа го собори рекордот на својот сонародник Оле Еинар Бјорндален, кој има два помалку (8-4-1). Руската чест ја одбрани младата Алина Загитова (15), која беше доминантна меѓу девојките во уметничко лизгање и една од најмладите олимписки шампионки во историјата на ЗОИ.

Според зборовите на претседателот на организацискиот комитет на ИОК Хи Бом Ли, ЗОИ во Пјонгчанг ги следеле над 1,3 милион луѓе.
– Олимписките игри беа посетени од точно 1.336.326 гледачи. Беа продадени 1.075.995 билети, а најпосетен ден беше 17 февруари, кога на олимписките борилишта имаше 146.506 гледачи – рекол Ли.

Како и да е, Игрите во Пјонгчанг заслужија високи оцени и во сите аспекти – организација, безбедност, брзо и ефикасно справување со хакираниот систем, справувањето со ниските температури, силните ветрови како и навреме завршените и реализирани натпреварувања во сите дисциплини. Сѐ во духот на спортот и мирот, како што гласеше и пораката на свеченото отворање на Игрите во Пјонгчанг.