Прегледајте го сами вашиот миленик

527

Ако се сомневате дека кучето има некакви здравствени проблеми, најпрво посветете внимание на неговото однесување

Секако дека ветеринарот знае најдобро, но некогаш едноставни прегледи на вашиот миленик можете да направите и сами дома.
Кучињата се најолабавени кога се дома, па затоа ако се посомневате дека не им е добро, дека нешто не е во ред со нив, можете сами да направите неколку едноставни тестови и тогаш, доколку утврдите некоја промена, задолжително посетете ветеринар.
Ако се сомневате дека кучето има некакви здравствени проблеми, најпрво посветете внимание на неговото однесување, како на пример дали доволно јаде и пие вода, како изгледа, дали си игра и дали е расположено. Тоа секогаш се знаци што укажуваат дали вашиот миленик е здрав или нешто го мачи.

Измерете му ја температурата
Овој преглед и не им е баш најомилен на кучињата, исто како и на луѓето, но ова е прв чекор во идентификувањето на здравствената состојба. Дигиталниот ректален топломер е најпрецизниот начин, а ако сѐ уште немате таков време е да купите и да го имате во домашната аптека. На врвот на топломерот намачкајте малку лубрикант, за мерењето да биде попријатно. Нормалната температура кај кучињата е помеѓу 37,7 и 39 степени.
Измерете му го пулсот
Најдобар начин да му го измерите пулсот на вашиот миленик е да ја пронајдете феморалната артерија, која се наоѓа кај препоните. Избројте го бројот на отчукувања во текот на петнаесет секунди и тој број помножете го со четири. Пулсот кај кучињата варира, а за нормален се смета оној помеѓу 80 и 120 отчукувања во минута. Пулсот на помалите кучиња е побрз за разлика од поголемите.
Прегледајте му ја главата
Носот треба да е чист и мазен. Очите – бистри, чисти, со неколку видливи крвни садови и со зеници со иста големина. Ушите – чисти и суви. Кога лесно ги масирате ушите кучето не би требало да се побуни, туку да изгледа релаксирано. Да има чисти и бели заби, розови непца, влажни на допир.
Гледајте го градниот кош додека дише
Градниот кош треба олабавено да се поместува додека кучето дише и издишува, без никаков напор. Секое вдишување и издишување треба да биде идентично. Нормално е во текот на една минута кучето да вдише петнаесет до триесет пати. Малите кучиња дишат побрзо од големите.
Прегледајте му ја кожата
Кожата на здравото куче е мека, без видливи рани или оштетувања и без мирис. Освен кај кучињата со остри влакна, влакната би требало да се меки и сјајни. Доколку забележите рани или првут – посетите ветеринар.
Проверете му ја хидрираноста
Наједноставниот тест е да му ја стиснете кожата на вратот или на грбот, и доколку таа веднаш се врати во првобитната положба, тогаш кучето е добро хидрирано. Доколку на кожата ѝ треба повеќе време да се врати во почетната состојба или забележите дека е набрана, тоа значи дека е дехидрирано.
Прегледајте му го стомакот
Лесно притиснете го стомакот на вашиот миленик и проверите дали чувствувате некакви израстоци. Проверете дали му е пријатно на кучето или нешто го боли. Веднаш по јадењето, во делот под градите, лево под градниот кош треба да забележите зголемување на тој дел од стомакот, што е целосно нормално. Секоја друга невообичаена или неудобна реакција од кучето додека лесно му го притискате стомакот, значи дека постои некој проблем со стомакот или со внатрешните органи и дека е време за посета на ветеринар.