Промоција на стихозбирката „На погрешната страна“

55

Промоција на стихозбирката „На погрешната страна“ на Пајо Авировиќ ќе се одржи вечерва, во 19 часот, во Музејот на македонската борба. Промотори на книгата ќе бидат Sвездан Георгиевски и Владимир Мартиновски.

– Стихозбирката „На погрешната страна“ е своевиден амалгам на вештината на управување со зборот на авторот и насобраната мудрост, пренесена преку кристално чисти и бескрајно хумани пораки. Стиховите на Авировиќ никого нема да остават рамнодушен. Тие удираат директно во стомакот и срцето, притоа интензивно дејствувајќи врз мозочните клетки. Со други зборови, „На погрешната страна“ го има оној непроценлив квалитет, неопходен за секоја врвна уметност – ве тера на размислување, притоа приредувајќи ви непроценливо естетско искуство – вели Sвездан Георгиевски во рецензијата за книгата.

Пајо Авировиќ е роден во Скопје во 1966 година. Автор е на романот „Џахиз и истребувачите на кучиња“ за кој ја добива наградата „Роман на годината“ на „Утрински весник“ во 2005 година. „На погрешната страна“ е негова втора книга и прва збирка поезија.
Илустрацијата и дизајнот на корицата се на Зоран Кардула.