Кога станува збор за намалување на штетните емисии, некои држави поставуваат високи цели, но на долг рок не постигнуваат резултати, додека други отфрлаат големи обврски на меѓународната сцена, меѓутоа добиваат добри оцени за ограничување на нивните емисии на стакленички гасови. За жал, за повеќето држави важи правилото дека „предоцна се реагира“. Научниците веруваат дека глобалното затоплување од вкупно два степена Целзиусови веќе ќе го зголеми нивото на морињата за 56 сантиметри, жешките денови за 25 отсто и се заканува сушните периоди да траат до четири месеци. Затоплувањето од три степени Целзиусови се смета дека ќе доведе до силни нарушувања на екосистемите.
Истражувачката организација за следење на климатската акција ги објавува целите и проектираните постигнувања врз основа на конкретни политики и активности што веќе се во сила до 2030 година. Според организацијата, Индија и Кенија се двете земји што ги отфрлија обврските поврзани со климатските цели, но се на добар пат да ги остварат целите за ограничување на глобалното затоплување на 1,5 или два степени Целзиусови. Од поголемите индустријализирани држави, Европската Унија и Велика Британија, како и Јужна Африка во моментов се единствените земји каде што се очекува да биде постигната целта за ограничување на глобалното затоплување на два степена Целзиусови.
