На сцената на амфитеатарот во древниот антички град Стоби, од 19 до 29 јули, ќе се одржи 17-от интернационален фестивал на античка драма „Стоби“, кој го организира општината Велес. Фестивалот свечено ќе биде отворен утревечер во 21 часот, со премиерата на претставата „Лисистрата“, во изведба на ансамблот на народниот театар „Јордан Хаџи Константинов-Џинот“ од Велес.
– Годинава го враќаме фестивалот онаму каде што бил, во античкиот театар во Стоби, што значи враќање на духот на самиот антички театар за по две илјади години на исто место да се сретнат гледачите и актерите – вели директорот на Велешкиот народен театар, Младен Крстевски.
Во изминатите три години, поради реконструкција на амфитеатарот во античко Стоби, фестивалот се изведуваше на сцената на Велешкиот театар. Наместо традиционалниот термин, крајот на јули и почетокот на август, во 2015 година фестивалот се одржа на крајот на септември, а во изминатите две години на почетокот на октомври. Годинава, на радост на многубројната публика, „Стоби“ повторно се враќа во стариот термин – крајот на јули.

Организаторите годинава за фестивалот обезбедија бесплатно пет автобуси, со кои ќе се носат посетителите од Велес до Стоби. Освен кај автобусите, кои ќе поаѓаат во 20 часот, билети ќе можат да се набават и на касата од Велешкиот народен театар. Сите претстави ќе почнуваат во 21 часот.
На 20 јули ќе биде изведена претставата „Јулиј Цезар“ на Народниот театар од Битола. На 22 јули на сцената во Стоби, со претставата „Ардалион“, ќе настапи Ереванскиот државен театар на пантомима од Ерменија. На 26 јули ќе биде изведена претставата „Кралските копилиња“, во изведба на Народниот театар од Велес. На 28 јули на древната сцена во Стоби е претставата „Нерон и јас“, на Жамбилскиот областен руски драмски театар, Казахстан. Фестивалот ќе биде затворен со претставата „Лисистрата“, која ќе има репризна изведба.
Како новина на фестивалот, годинава првпат ќе се одржуваат и пет тркалезни маси на кои ќе се говори за претставите. Првата тркалезна маса е закажана овој петок, во 12 часот, во просториите на Народниот театар во Велес.

Директорот на Велешкиот народен театар потсети дека и годинава на фестивалот ќе бидат доделени наградите за најдобра машка и женска улога, за најдобра режија и гран при за најдобра претстава, како и две придружни награди. Тој најави дека идната година ќе бидат именувани сите награди. На пример наградата за најдобра женска улога ќе се вика „Тинка Коларова“, а ќе биде именувана во чест на првата жена актер од Велешкиот театар. Наградата за најдобра машка улога ќе се вика „Тодорче Николовски“, а за најдобра режија „Стојан Стојановски“, во чест на овој познат македонски режисер.
Претседател на жирито, кое ќе ги доделува наградите годинава, ќе биде познатиот руски режисер Николај Круглов, а членови актерот Мето Јовановски и актерката и театрологот Ана Стојановска.