Барди постигна два гола од слободен удар во понеделникот

Со два спектакуларни гола од слободен удар за две минути македонскиот фудбалски репрезентативец Енис Барди речиси го спаси шпанскиот прволигаш Леванте од испаѓање од лигата и влезе во фокусот на вниманието во таа земја поради тоа што и во светот е реткост на ваков начин во толку краток период некој да постигне два гола. Леванте го победи Атлетик со 3-1.

Барди головите ги постигна речиси на идентичен начин. Прво од речиси левата крилна позиција го погоди голот, а голманот ја фати топката зад гол-линијата. Во вториот случај шутот беше од аголот на шеснаесетникот од левата страна, топката влезе во десниот горен агол, а голманот не трепна.
Ова е четврти гол од слободен удар за Барди сезонава за Леванте (вкупно постигна шест гола и има една асистенција), а според некои статистички податоци повеќе голови од слободен удар од Барди сезонава постигна само Аргентинецот Лионел Меси од Барселона, шест. Трет на таа листа е Арбилја од Еибар со два гола од прекин на игра.
Барди е втор стрелец на Леванте сезонава (Моралес има седум гола) и е меѓу десетте најефикасни плејмејкери во Шпанија.