Шампионот во подобра форма од претендентот за светската круна

670

На силниот турнир во Азербејџан Манус Карлсен го освои првото место, додека Фабијано Каруана на првенството на САД заврши втор

Актуелниот 16-ти светски првак во шах, Норвежанецот Магнус Карлсен, и претендентот за таа титула, Американецот Фабијано Каруана, кои во ноември во Лондон треба да играат меч за светската круна, имаа различно oстварувaње на два неодамна завршени турнира. Карлсен на силниот 5-ти меморијал „Вугар Гашимов“ во Азербејџан (21. категорија, просечен рејтинг на шахистите од 2.768 поени), третпат триумфира, додека Каруана на првенството на САД во Сент Луис, заврши како втор и со тоа не успеа да го повтори успехот од 2016 година кога првпат ја освои титулата.
Карлсен (2.834 рејтинг-поени) во градот Шамкир триумфира со шест поени од девет можни (три победи и шест ремија), пред Кинезот и член на Алкалоид, Лирен Динг (2.778) со 5,5 и Русинот Сергеј Карјакин (2.778) со 5 поени. Понатаму следуваат: Раџабов, Мамеѓаров, Војташек и Гири, сите со по 4,5 поени, Мамедов и Топалов со по четири и Навара со 2,5.

– Мислам дека на турнирот не одиграв партија што ќе влезе како дел од колекцијата на моите најдобри игри, но сметам дека против Аниш Гири имаше убава борба на таблата – нагласи Карлсен по триумфот, истакнувајќи дека сѐ уште не размислува да почне со посебни подготовки за мечот со Каруана.
За Карлсен, покрај наградата од 30.000 евра, ова беше и втор победнички турнир годинава, а 30-ти супертурнир на кој е прв, остана непоразен и по 32 партии, а заработи и нови 4 рејтинг-поени. На најновата мајска рејтинг-листа Карлсен и понатаму е прв со 2.843 поени, додека Каруана скокна од третото на второто место (2.818), заостанувајќи зад Карлсен 25 поени.
И двајцата во мај и во јуни се очекува да играат на ист турнир во Норвешка, има најави дека Карлсен ќе игра и во јули на силен турнир, а Каруана во септември пак ќе го предводи тимот на САД на Шаховската олимпијада, за одбрана на златото од 2016 година.

По малку изненадувачки, пак, нов, 62-ри по ред шампион на САД стана Самуел Шанкленд (26), кој во конкуренција на 12 шахисти освои 8,5 поени (три победи и пет ремија), наградата од 50.000 долари и првпат имаше рејтинг над 2.700 поени. Каруана (2.804) го освои второто место со 5,5 поени (две победи, седум ремија, и еден пораз), трет е ланскиот првак Весли Со (2.796) со 6,5, а четврти е победникот од 2015 година, Хикару Накамура (2.787), со 5,5 поени.
– Ова е резултат над моите соништа. Никогаш не помислив дека имам шанси да победам на турнирот. Ќе биде неверојатно да се наречам шампион на САД – задоволно нагласи Шaнкленд.