Промоција на каталогот „Отаде црнилото“ на Жерновски

31

Промоција на каталогот од изложбата „Отаде црнилото“ на уметникот Велимир Жерновски ќе се одржи вечерва, во 19 часот, во Музејот на современата уметност.
Изложбата на Жерновски е критика на монструозната логика на капиталот, пишува Љиљана Неделковска во текстот во каталогот. Според неа, уметникот алармира за неизвесноста на нашата иднина, за можноста неповратно да ја загубиме својата природна и симболичка средина и да се сведеме на празна обвивка, на тело без супстанцијална содржина.

– Неговата видеоинсталација е визија на едно такво тело, тело редуцирано само на својата основна функција: дишењето. Но Жерновски во исто време си „поигрува“ и со научната претпоставка на Стивен Хокинг дека „црните дупки не се толку црни“ дека тие, и покрај тоа што создаваат огромна гравитација на која ништо не може да ѝ избега, па дури ни светлината, сепак, можат да послужат и како премин кон некој друг универзум. Дали е тоа случај и со капиталот? Дали капиталот е нашата црна дупка што во себе, од една страна, го впива и го уништува и најургентниот апел за зачувување на животот на Земјата, додека, од друга страна, отвора можности, преку енормните инвестиции во вселенската програма, човекот да се надева и да сонува за други светови? Ова е прашање пред кое на еден луциден начин нè поставува изложбата „Отаде црнилото“, изложба што, освен од видеоинсталации, се состои и од неколку скулптури со кои се претставени астронаути во различни позиции – вели Неделковска.

Фотографиите се на Самир Љума, Жарко Чулиќ, Благоја Варошанец и Лилика Стрезоска. Музичкиот избор за вечерта е на Еми Ермилова.