„Лучија од Ламермур“ на „Мајските оперски вечери“

104

Оперската претстава „Лучија од Ламермур“ на Гаетано Доницети и изложба на фотографии на оперската примадона Ана Липша Тофовиќ „Божествена симбиоза“ ќе се одржат вечерва, во рамките на 47-те „Мајски оперски вечери“. Во главната улога како Лучија ќе настапи нашата светски позната првенка Ана Дурловски, која бележи успешна светска кариера. Италијанскиот баритон Франческо Вултаџо, добитник на многубројни интернационални награди, ќе настапи во улогата на Енрико, додека во улогата на Едгардо ќе настапи Ифрим Космин од Романија, кој со својот полн и обоен тенорски глас бележи настапи на многубројни престижни оперски сцени и театри низ светот. Во улогата на Рајмондо ќе настапи гостинот од Србија Иван Томашев, солист на Националната опера во Белград, а во улогата на Артуро Марјан Николовски. Марика Поповиќ и Јане Дунимаглоски ќе ги видиме во улогите на Ализа и Нормано.
Диригент е гостинот од Бугарија Најден Тодоров.

Оваа година дел од „Мајските оперски вечери“ ќе биде и изложбата на фотографии на оперската примадона Ана Липша Тофовиќ „Божествена симбиоза“. Проектот се реализира по иницијатива и со финансиска поддршка од Матицата на иселениците од Загреб, Советот на македонското национално малцинство на градот Загреб и Заедницата на Хрватите во Република Македонија, а се однесува на афирмација на истакнатата музичка уметница Ана Липша Тофовиќ од Република Хрватска. Проектот има цел да ѝ ги презентира на јавноста животните стории и фрагментите од дејствувањето на Ана Липша Тофовиќ на овие простори преку изложба на нејзини предмети, фотографии, костими, плакати и сѐ што е зачувано. Изложбата ќе се одржи во фоајето на Националната опера и балет од 15 до 31 мај. Отворањето на изложбата е вечерва во 19 часот.