Ентони Бордејн постхумно награден со шест награди „еми“

115

Познатиот готвач Ентони Бордејн, кој се прослави известувајќи од разни делови на светот, постхумно беше награден со шест награди „еми“ за својата патеписно-кулинарска емисија „Непознати предели“.

Серијата беше наградена во четири категории, а самиот Бордејн доби две постхумни статуетки – за сценарио за документарна програма и за информативна емисија. Токму наградата за сценарио е особено значајна за екипата од серијата.

– Тони беше номиниран за оваа награда „еми“, но никогаш не ја доби. Многу ја посакуваше. Затоа ја примам со задоволство, измешано со горчина – истакна продуцентката Лидија Тенаљи.

Последните седум епизоди од шоуто ќе бидат емитувани на Си-ен-ен од 23 септември. Ентони Бордејн изврши самоубиство на 8 јуни годинава, на 61-годишна возраст, во Франција, каде што ја снимаше последната сезона од емисијата.