Фото: Принт-скрин

„Европскиот воз“ вечерва пристигна на железничката станица во Скопје, во рамки на глобалниот настан „Конектинг Јуроп Експерес“ со кој се одбележува „годината на железницата“.

Со возот пристигна министерот за транспорт и врски, Благој Бочварски, по неговото денешно учество на самитот посветен на развојот на железницата во земјите од Западен Балкан, одржан во Белград.

– „Европскиот воз“ за нас претставува доказ за пријателство, за одличната соработка што ја имаме со нашите партнери од Европската Унија, како и за поддршката што ни ја овозможуваат во развојот и модернизацијата на целиот транспортен сектор – истакна министерот.

Евроамбасадорот Дејвид Гир порача дека пристигнувањето на возот ја претставува симболиката за подобра поврзаност, која е високо на агендата на ЕУ.

Предвидено е „Европскиот воз“ да посети 26 држави од Европа, а негова следна станица е Атина. Возот тргна од Лисабон на 2 септември, а негова последна дестинација ќе биде Париз на 7 октомври.