Промовирана кампањата „Ги возиме одговорните“

782

Кампањата за безбедност во сообраќајот насловена „Ги возиме одговорните“, беше промовирана денеска во Скопје.

Со кампањата ќе се мотивираат граѓаните да бидат одговорни кога посетуваат ресторан и консумираат алкохол односно да не управуваат со моторно возило. Како награда за тоа ќе добијат гратис ваучер за такси возење во износ од 100 денари. Со секоја он-лајн резервација направени преку www.restorani.mk гостите ќе добијат ваучер во ресторанот.

– Многу загрижуваат бројките на пијани возачи во нашиот град. Пред некој викенд дури 500 возачи беа фатени како возат под дејство на алкохол. Со вакви бројки воопшто не е ни чудо што сме на дното на листите на безбедност на улиците во европски рамки. Град Скопје и во иднина ќе ги поддржува сите иницијативи од овој вид, затоа што безбедноста на нашите сограѓани нема цена – истакна на прес-конференција градоначалникот на Град Скопје, Петре Шилегов.

Додаде дека Град Скопје одлучил да го поддржи овој проект заедно со Автомото сојузот на Македонија и Републички совет за безбедност на сообраќајот на патиштата од причина што безбедноста на учесниците во сообраќајот во Скопје е еден од врвните приоритети на градската администрација.