Вчера попладне во Кичево, по шести пат, се одржа Отворениот ден на мултикултурализмот. Многубројните присутни можеа да проследат културно- уметничка програма која ја сочинуваа македонски и албански ора, турска драма и влашки игри. Исто така, на присутните на овој настан им беа презентирани народните носии на сите етникуми што живеат во кичевската општина.
На Отворениот ден беше извршена дегустација на храна својствена за сите етнички групи од овие простори, односно македонска, албанска, ромска, влашка, турска и српска. Можеше да се вкусат питулици од повеќе видови, ѓомлезе, турска баклава, шеќерпаре, слатки и солени колачи и торти, кифлички и разни печива.
-Она што го планиравме за шестиот Отворен ден на мултикултурализмот во целост и го спроведовме. Ги презентиравме народните носии од сите етнички заедници, понудивме културно-забавна програма за сите вкусови, а завршницата на овој традиционален настан беше предвидена за дегустација на храна изработена од членовите на здружението „Вредит да си од Кичево“ и нивните помагатели. Добрата посета и разновидните содржини беа мамка за голем број граѓани на Кичево – истакна Јани Зердески, член на здружението „Вредит да си од Кичево“.
Оваа манифестација беше помогната од страна на Општина Кичево, Центарот за култура „Кочо Рацин“ и Министерството за култура на РСМ.
З.А.
