Започнаа одбележувањата на 19-годишнината од масакрот кај Карпалак

146

Со полагање на цвеќиња на спомен обележјето во касарната „Мирче Ацев“ вечерва започнаа активностите за одбележување на 19 години од масакрот кај Карпалак. во кој на 8 Август, 2001 година во заседа животите во одбрана на татковината ги дадоа десетмина прилепски бранители – Нане Наумоски, Сашо Китаноски, Бранко Секулоски, Ердован Шабаноски, Љубе Грујоски, Горан Миноски, Веби Рушитоски, Дарко Велјаноски, Марко Деспотоски и Пецо Секулоски. Почит во кругот на Касарната им оддадоа претставници од АРМ, од општина Прилеп, од семејствата на загинатите, од Здружението Карпалак, како и претставници на политички партии.

При тоа потполковникот Ѓорѓи Василевски, командант на гарнизонот „Мирче Ацев“ посочи дека загинатите од Карпалак се преселија во вечноста.

-Овие луѓе застанаа на браникот на татковината. Се впишаа во бесмртните. Ќе останат да сведочат и низ годините кои што доаѓаат. Ќе сведочат и убедуваат дека слободата е многу скапа та затоа и се брани секој ден и постојано. А, ние , вашите браќа по оружје ќе продолжиме да го гарантираме мирот и безбедноста на секој македонски граѓанин – рече потполковникот Василевски.

Дел од преживеаните велат дека непроболот не минува и по 19 години. Истакнуваат дека и ден денес нема објаснување што тоа им се случи. Цвеќиња беа положени и на спомен обележјето во црквата Св. Петка во Лениште.

Честувањата по повод 19 години од масакрот кај Карпалак продолжуваат утре, сабота, утрото на местото на настанот и на пладне во центарот на Прилеп.

Ка.М.