Резолуцијата мора да биде во согласност со Уставот, изјави портпаролот на СДСМ, Костадин Костадинов, прашан за резолуцијата што ја поднесе опозицијата во Собранието, а во која стоело името С Македонија, што за власта не е прифатливо бидејќи тоа не е уставното име на државата.

Костадинов вели дека Република Северна Македонија самите преговори во рамки на ЕУ ги води согласно уставното име и прифаќањето на резолуција со друго име може да направи штета.

„Нашиот став е сосема јасен, текстот на резолуцијата, таков каков што е, е прифатлив согласно Уставот. Овде се отвора прашањето дали со таквото прифаќање на резолуцијата како што тие ја поднесуваат може да направиме штета на интеграцискиот процес на Република Северна Македонија, дали можеби конечно од друга страна ВМРО-ДПМНЕ ќе се издигне над партиските интереси и ќе го прифати Договорот од Преспа со што навистина имаме одлична основа да ги зајакнеме и да ги заштитиме националните интереси“, рече Костадинов.

Како што додаде, преговори и разговори за македонскиот идентитет, за македонскиот јазик ниту имало, ниту има, ниту во иднина ќе има.

Тој рече дека како пратеник до вчера лично ја немал формално добиено резолуцијата.

„Кога ќе ја видиме резолуцијата во рамки на координација како пратеничка група ќе разговараме и ќе видиме каков ќе биде настапот како колектив“, рече Костадинов.