Очекувам добри вести од Атина, изјави денеска премиерот Зоран Заев, за време на посетата на Битола, осврнувајќи се на престојот на министерот за надворешни работи Никола Димитров на меѓународна конференција што е во тек во близина на главниот грчки град.
Тој додаде дека е оптимист заради она што досега е направено во процесот на преговарање со Грција.
– Среќен сум што можам да кажам дека имаме успеси кои 27 години никој не успеал да ги постигне, а целосно ќе бидам среќен ако проблемот се реши, а притоа се сочува достоинството и идентитетот на македонскиот народ и држава. Тоа е многу важно, бидејќи треба да се знае што добиваме, а добиваме перспектива, добиваме иднина, добиваме имотен лист, ќе впишеме во катастар Република Македонија, ќе добиеме НАТО и ЕУ, граѓаните ќе добијат повеќе пари, економска стабилност. Сето тоа за мене е чин на патриотизам, и јас верувам дека сите чинители, заедно, ќе го направиме чекорот за да се надмине ова последно отворено прашање кое го има нашата држава, а потоа растоверени да се посветиме на перспективите – изјави Заев на прес конференција во Битола.
Според него, очекувањата се да има решение и, како што рече, очекувам да имаме решение пред да одлучува Европскиот Совет, а тоа е крајот на јуни, бидејќи тогаш ќе бидеме сигурни дека ќе добиеме датум за преговори, а познато е дека поканата од НАТО е по автоматизам.
-Сè се сведува на донесување на решение пред самитот на ЕУ, што ќе се одржи кон крајот на јуни – нагласи Заев.
