Претседателот на Владата, Зоран Заев, денеска ја прими во посета новоименуваната амбасадорка на САД во земјава, Кејт Мари Брнз. Тој ѝ посака добредојде и успешен мандат на амбасадорката Брнз и изрази благодарност за одличната работа на претходниот американски амбасадор Џес Бејли и заменик шефот на мисијата, Микаела Швајцер Блум.

Заев како долгорочен интерес на земјата го издвои натамошното интензивирање на билатералната политичка и економска соработка со САД, како и посветеноста на реформската ЕУ агенда за достигнување конкретни резултати во областа на владеењето на правото, антикорупцијата, реформите во безбедноста и јавната администрација.

Премиерот Заев и амбасадорката Брнз се согласија дека Република Македонија останува стабилен стратешки партнер на САД, фокусиран на заедничките заложби за безбедност, слобода и демократски просперитет во регионот, како и за заедничките активности во борбата против тероризмот и другите закани кон мирот во светот.

На средбата е изразена подготвеност за прифаќање на обврските кои произлегуваат од полноправното членство на НАТО до крајот на 2019 и почетокот на 2020 година, како што е зголемувањето на БДП од 0,2 отсто годишно на 2 отсто до 2024 година, модернизација на армиските капацитети и зголемување на учеството во заеднички мисии.

Амбасадорката Брнз на средбата рече дека САД со нетрпение очекуваат во наредните месеци да ѝ посакаат добредојде на Македонија како 30-та членка на НАТО и додаде дека ќе ги вложи своите капацитети и досегашно искуство за да успешно продолжи економската и политичката соработка меѓу САД и Македонија.