Претседателот на Градскиот комитет Скопје на ВМРО-ДПМНЕ, Владимир Нелоски, обраќајќи се од протестот пред Министерството за здравство насловен „Здравје, а не провизија“, го искажа разочарувањето и незадоволството од Влада поради тоа што, како што рече, таа не се справува како што треба со пандемијата.

Нелоски, од протестот повика на оставка од Венко Филипче, како што го нарече, министер за здравство и провизија, затоа што додека во Македонија од коронавирус, дневно, животот го губат по 50 македонски граѓани, тој и луѓето од власта низ Македонија се шетаат со хеликоптери.
– Јас драги пријатели се срамам што денеска сме април месец, а имунизацијата не е започната. Се срамам што министер на друга држава направил повеќе за нашите граѓани од нашиот министер. Се срамам што, додека премиери на наши соседи успеваат и да извезат вакцини, а кај нас се уште не можат да увезат. Се срамам бидејќи денеска кога, најверојатно, повторно ќе имаме голем број на починати, половина влада, пет министри и премиерот одат во Велес, пазар да отворат – рече Нелоски.

На крајот на протестот тој заедно со луѓето кои со него се собраа да го искажат револтот кон министерството за здравство и Владата предводена, фрлаа балони полни со вода кон зградата на министерството за, како што рече Нелоски, колку толку да го измијат срамот.