Премиерот Бојко Борисов и германската канцеларка, Ангела Меркел, како и нивните тимови, вршат редовна комуникација на сите теми од заеднички интерес. И премиерот Борисов и канцеларката Меркел се заинтересирани да најдат решение за прашањето со Скопје, соопшти бугарската влада.
Од таму велат дека напорите на бугарската страна отсекогаш биле и продолжуваат да бидат насочени кон постигнување дијалог и разбирање за решавање на билатералните прашања со Република Северна Македонија, но, како што се наведува во соопштението, за оваа цел тоа мора да го посакаат и спроведат двете страни.
Претходно, беше објавено дека Меркел разговарала со бугарскиот премиер за блокадата за Македонија.
Одговарајќи на пратеничко прашање во Бундестагот, Меркел изразила очекување за надминување на бугарската блокада во блиска иднина.
Германската канцеларка вчера во Бундестагот беше критикувана од пратеникот од нејзината партија ЦДУ, Гинтер Крихбаум, во врска со неуспехот на германското претседателство со ЕУ да ги почне пристапните преговори со Македонија до крајот на годинава, како што беше ветено.
Крихбаум оцени дека јавноста уште еднаш била сведок на злоупотребата на правата на земјите членки во рамките на ЕУ.
Тој ја праша Меркел како ги оценува шансите во блиска иднина да се надмине блокадата на Бугарија, на што таа кусо одговори: „Уште еднаш разговарав со бугарскиот премиер Бојко Борисов и се надевам дека овие прашања ќе се надминат во блиска иднина“.
